Ministri i Sigurisë Kombëtare i Izraelit, Itamar Ben-Gvir, ka thënë se nuk do të votojë në favor të marrëveshjes së armëpushimit në Gaza në mbledhjen e kabinetit që është duke u zhvilluar tani.
Ben-Gvir, udhëheqësi i partisë së ekstremit të djathtë Fuqia Hebraike, thotë se vendimi i tij është për shkak të lirimit të të burgosurve palestinezë si pjesë e marrëveshjes.
Ai ka kërcënuar se do të rrëzojë qeverinë e koalicionit të kryeministrit Benjamin Netanyahu nëse ai nuk mbetet i përkushtuar për t’i dhënë fund sundimit të Hamasit në Gaza.
“Krahas lajmit të mirë për lirimin e të gjithë pengjeve tona, nuk harrojmë qëllimin qendror të luftës që u përcaktua që në fillim të saj: të sigurohemi që kjo katastrofë të mos përsëritet – përmes çmontimit të sundimit të Hamasit”, shkroi Ben-Gvir në një postim në rrjetet sociale.
“Në bisedat e zhvilluara midis meje dhe kryeministrit ditët e fundit, e bëra të qartë se në asnjë rrethanë nuk do të jem pjesë e një qeverie që lejon ekzistencën e vazhdueshme të sundimit të Hamasit në Gaza.
“Kjo është një vijë e kuqe e qartë. Kryeministri më premtoi se kështu do të jetë.”
Ben-Gvir këmbënguli se nuk do të “ndihmojë në asnjë rast mashtrimi”, ndërsa paralajmëroi se do të rrëzojë qeverinë e Netanyahut nëse Hamasi nuk shpërbëhet.
“Nëse sundimi i Hamasit nuk shpërbëhet, ose nëse na thuhet vetëm se është shpërbërë, ndërsa në praktikë vazhdon të ekzistojë nën një maskë tjetër – Fuqia Hebraike do ta shpërbëjë qeverinë”, shtoi ai.
