Rafa Leao nuk ishte i pranishëm ndaj Cremoneses dhe mungesa e tij u ndje thellë në repartin ofensiv të Milanit. Portugezi është në qendër të planeve të Allegrit, por dëmtimi në pulpë e vë në dyshim edhe për ndeshjen ndaj Lecces
Milani po kalon ditë të vështira pa Rafa Leaon, sulmuesin që konsiderohet si shtylla kurrizore e repartit ofensiv.
Mungesa e tij kundër Cremoneses u ndje menjëherë, me skuadrën që u shfaq pa ide dhe pa gjallëri përpara portës, duke konfirmuar se fantazia e portugezit është burim i pazëvendësueshëm për lojën e kuqezinjve.
Portugezi është një lojtar, i cili jo vetëm krijon raste, por është i aftë të bëjë diferencën në çdo moment me shpërthimet dhe shpejtësinë e tij.
Në Milanello, kujdesi për Leaon është maksimal. Ai vazhdon stërvitjen e diferencuar në qendrën sportive të Carnagos, nën monitorimin e vazhdueshëm të stafit mjekësor.
Trajneri Massimiliano Allegri dhe drejtuesit e klubit kanë vendosur të mos rrezikojnë në asnjë mënyrë shëndetin e 26-vjeçarit. Flitet për një vendim strikt: ai do të luajë vetëm nëse do të jetë 100% i rikuperuar.
Ndeshja kundër Lecce-s, që do të zhvillohet të premten në “Via del Mare”, duket se vjen shumë shpejt për Leaon. Vendimi përfundimtar do të merret vetëm në orët e fundit para ndeshjes, por shanset që portugezi të jetë titullar janë minimale.
Në rast se mungon, synimi është që rikthimi të ndodhë më 24 shtator, në “San Siro”, kundër Bolognas, në sfidën e parë pas pushimit të kombëtareve.
Për tifozët, pritja është e vështirë, pasi Milani duket një skuadër tjetër pa Leaon. Drejtuesit e shohin si lojtarin më vendimtar të projektit aktual, ndërsa Allegri është i vetëdijshëm se objektivat sezonalë varen shumë nga gjendja fizike e numrit 10.
Rikthimi i tij i shëndetshëm pritet si oksigjen për një skuadër që nuk mund të lejojë hapa fals në garën për titull.
