Prej javësh është përfolur si ide e largët, një lloj “fantamercato”, por tashmë hipoteza që Juventus dhe Milan të realizojnë një shkëmbim mes Dusan Vlahović dhe Theo Hernández po fiton terren.
Ende nuk ka një marrëveshje konkrete, por dy klubet kanë nisur sondazhet dhe po e konsiderojnë seriozisht një operacion të tillë, që në letër duket logjik dhe i favorshëm për të dyja palët.
Të dy lojtarët kanë kontrata që skadojnë pas një viti dhe të dy shihen si “tepricë luksi” nga klubet përkatëse.
Vlahović dhe Theo duan të ndryshojnë ambient dhe janë të pëlqyer nga trajnerët e skuadrave respektive: Allegri e sheh Vlahović-in si sulmuesin ideal për repartin ofensiv, ndërsa Fonseca e konsideron Theo një element vendimtar në skemën e tij.
Nga ana ekonomike, të dy lojtarët mund të kenë një vlerësim rreth 30 milionë euro, çka do t’u lejonte klubeve të shmangnin humbje kapitale dhe madje të regjistronin ndonjë plus-valencë në bilanc.
Po ashtu, do të evitonin rrezikun për t’i humbur lojtarët me parametër zero vitin e ardhshëm. Në këtë kontekst, një marrëveshje tani do të ishte më e leverdishme për të gjithë.
Problemi kryesor mbetet paga. Theo kërkon rreth 6 milionë euro në sezon, shifër që e kishte kërkuar edhe nga Milani për rinovimin, dhe kjo nuk përbën një pengesë serioze për Juventusin.
Ndryshe qëndron situata me Vlahović-in, i cili te bardhezinjtë kishte të ardhura që shkonin deri në 12 milionë euro në sezon.
Shifër e papërballueshme për Milanin, i cili mund të ofrojë maksimumi 6 milionë, ndoshta duke i propozuar një kontratë afatgjatë që do t’i siguronte sulmuesit serb të njëjtat të ardhura në total.
