Një njoftim pozitiv për një armëpushim në Rripin e Gazës mund të shpallet sot, sipas një zyrtari të lartë rajonal të përfshirë në negociatat, i cili foli për gazetën e Emirateve, The National. “Mund të ketë një njoftim pozitiv më vonë, por ende po punojmë për këtë,” deklaroi zyrtari, duke lënë të kuptohet se bisedimet janë në një fazë të avancuar.
Kryeministri i Katarit, Mohammed bin Abdulrahman Al Thani, ndodhet sot në Egjipt për të çuar përpara negociatat, ndërkohë që ndërmjetësit egjiptianë dhe katarianë kanë paraqitur një propozim për një armëpushim 60-ditor. Ky plan përfshin gjithashtu lirimin e 10 pengjeve izraelite dhe kthimin e trupave të të paktën 15 izraelitëve të vrarë. Si pjesë e marrëveshjes, pritet që Izraeli të lirojë qindra të burgosur palestinezë.
Propozimi gjithashtu përmban një garanci të shkruar nga Shtetet e Bashkuara, që siguron fillimin e negociatave indirekte mes Hamasit dhe Izraelit për tërheqjen e trupave izraelite nga Gaza dhe arritjen e një marrëveshjeje për një armëpushim afatgjatë.
Burimet thanë për The National se rreth 50 pengje vazhdojnë të mbahen nga Hamasi, nga të cilët besohet se rreth 20 janë ende gjallë. Në këtë kuadër, përpjekjet për të ndalur një ofensivë të mundshme tokësore izraelite në qytetin e Gazës janë intensifikuar.
Megjithatë, pengesat mbeten. Ministri i Jashtëm egjiptian, Abdr Abdelatty, deklaroi se “kushte të papranueshme aktualisht po pengojnë një marrëveshje gjithëpërfshirëse për Gazën”. Ai theksoi se propozimi është i bazuar në dokumentin e paraqitur nga i dërguari amerikan Steve Uitkoff, me disa modifikime, dhe se Egjipti ka ofruar ide që mund të kenë sukses nëse ekziston vullneti politik i Izraelit. Sipas burimeve për Al Arabiya, plani përfshin një tërheqje graduale të ushtrisë izraelite dhe është një kombinim i një zgjidhjeje të pjesshme dhe të plotë, me garanci nga SHBA.
Egjipti ka qenë i prerë kundër çdo përpjekjeje për zhvendosjen e popullsisë palestineze nga Gaza. Në një deklaratë zyrtare, ministria e jashtme egjiptiane paralajmëroi çdo shtet që të mos bëhet “bashkëfajtor” në atë që konsiderohet si “spastrim etnik dhe krim lufte”, sipas të drejtës ndërkombëtare. “Kushdo që merr pjesë në një plan të tillë, do të mbajë përgjegjësi historike dhe ligjore,” thuhej në deklaratë.
Ministri Abdelatty theksoi gjithashtu se pozicioni i Egjiptit për çështjen palestineze është i pandryshuar dhe akuzoi Izraelin për pengesat që po vendosen në kalimin e ndihmave humanitare përmes pikës kufitare të Rafah-ut.
Ai përfundoi duke thënë se “komuniteti ndërkombëtar nuk po ushtron presion të mjaftueshëm mbi Izraelin për t’i dhënë fund vuajtjeve të palestinezëve në Gaza.”
