Bisedimet e para të drejtpërdrejta mes Ukrainës dhe Rusisë, që prej javëve të para të luftës, u zhvilluan në Stamboll dhe zgjatën rreth dy orë, por nuk sollën asnjë përparim domethënës.
Burime diplomatike nga pala ukrainase bënë me dije se kërkesat e Rusisë ishin “përtej çdo gjëje të diskutuar më parë”. Një ndër pikat më të diskutueshme ishte kërkesa për tërheqjen e trupave ukrainase nga territori i tyre sovran, si kusht për shpalljen e një armëpushimi, çka është konsideruar e papranueshme nga Kievi.
Negociatat, të ndërmjetësuara nga Turqia, ishin të parat ballë për ballë pas më shumë se tre vitesh, dhe vijnë pas presionit të shtuar ndërkombëtar, sidomos nga Presidenti amerikan Donald Trump, i cili ka kërkuar me ngulm fundin e luftës në Evropën Lindore.
Në kontrast me delegacionin rus, të kryesuar nga ndihmësi i Putinit, Vladimir Medinsky, pala ukrainase kishte përfaqësim të lartë zyrtar me Ministrin e Mbrojtjes Rustem Umerov, Shefin e Zyrës së Presidentit Andriy Yermak dhe Zëvendësministrin e Jashtëm Andrii Sybiha.
Presidenti Trump, nga një vizitë në Emiratet e Bashkuara Arabe, deklaroi se për të arritur paqen, është i nevojshëm një takim i drejtpërdrejtë mes tij dhe Presidentit rus Vladimir Putin.
