Prej 12 ditësh, zjarrfikësit spanjollë nuk po vënë dot nën kontroll dhjetëra vatra zjarresh në gjithë vendin. Ndaj, dhe për këtë zjarr në zonën Korporales në rajonin verior të Leonit, krah tyre po luftojnë me flakët edhe kolegët nga Franca.
Kjo vatër është mes të paktën 23 të tjerave të mëdha që janë aktualisht aktive. (Video 2) Vatra më e përhapur dhe që ka shkaktuar më tepër dëme është ajo e Orenses në rajonin tjetër verior të Galicias, që ka shkrumbuar mbi 44 mijë hektarë tokë, përfshirë edhe dhjetëra banesa.
Në total, në gjithë Spanjën, 228 zjarre kanë shkrumbuar mbi 380 mijë hektarë këtë verë, një sipërfaqe sa ishulli i Majorkës, shifra më e lartë prej 3 dekadash.
Mbi 3 mijë e 400 zjarrfikës, përfshirë edhe ushtarë të ndihmuar nga 50 mjete ajrore, por edhe efektivë nga vendet e tjera të unionit janë aktualisht të angazhuar në luftën me flakët, që u ka marrë jetën 4 personave.
Në pranga kanë rënë 37 persona për zjarrvënie të qëllimshme. Situata emergjente është ndikuar edhe nga temperaturat mbi 40 gradë Celsius, ajri i thatë dhe erërat e forta që kanë karakterizuar motin e këtyre muajve jo vetëm në Spanjë, por në gjithë vendet mesdhetare europiane, si pasojë e ndryshimeve dramatike klimatike.
Sipas të dhënave të Bashkimit Europian, këtë vit janë shkrumbuar rreth 900 mijë hektarë pyje, më shumë se dyfishi i mesatares vjetore. Sllovakia ka thyer me 10 herë rekordin e saj historik këtë vit.
