Rusia ka prezantuar nëndetësen e saj të re bërthamore, të përshkruar si të aftë për të mbajtur një armë për “Ditën e Gjykimit” që mund të shkaktojë një valë radioaktive shkatërruese për mbarë botën.
Nëndetësja, e cila u vonua pesë vjet për shkak të arsyeve të pashpjeguara, u lëshua në Severodvinsk, në veri të largët të Rusisë, në prani të ministrit të Mbrojtjes Andrei Belousov. Gjigantja “Khabarovsk”, që përforcon kërcënimet e Putinit për një Luftë të Tretë Botërore, plotëson të gjitha kushtet për të lëshuar dronin bërthamor Poseidon drejt brigjeve perëndimore.
“Kryqëzori i rëndë me energji bërthamore ‘Khabarovsk’ po lëshohet nga kantieri i njohur ‘Sevmash’. Duke mbartur armë nënujore dhe sisteme robotike, ajo do të na mundësojë të sigurojmë me sukses kufijtë detarë të Rusisë dhe të mbrojmë interesat kombëtare në zona të ndryshme të oqeaneve të botës”, tha Belousov.
“Khabarovsk” tani do t’i nënshtrohet provave në det, ndërsa reaktori bërthamor dhe specifikimet teknike të tjera mbeten të klasifikuara si sekrete shtetërore. Putin deklaroi javën e kaluar se droni Poseidon, i cili mund të mbajë një kokë bërthamore, është testuar sakaq me sukses.
Poseidoni, që do të transportohet nga “Khabarovsk”, thuhet se është 20 metra i gjatë dhe gati 2 metra i gjerë, me peshë 100 ton. Ai është në gjendje të përshkojë deri në 6,200 milje, me shpejtësi 185 km/orë në thellësi të detit.
Nëndetësja e veçantë “Khabarovsk” është projektuar për të mbajtur deri në 12 torpedo vdekjeprurëse të këtij lloji të ri, secila e pajisur me reaktor bërthamor.
“Fuqia e Poseidonit e tejkalon atë të raketës sonë më të avancuar ndërkontinentale, Sarmat (e njohur edhe si Satan-2). Nuk ekziston asgjë e ngjashme në botë. Nuk ka asnjë mënyrë për ta ndaluar atë”, tha Putin duke paralajmëruar Perëndimin.
Propaganda ruse ka pretenduar shpesh se Poseidoni, i lëshuar nga nëndetësja “Khabarovsk”, mund të mbysë shtete si Britania nën valë radioaktive.
Nuk është bërë publik kostoja e nëndetëses, por me peshë 10,000 ton, ajo vlerësohet të ketë kushtuar mbi 1 miliard paund. Ndërtimi i saj nisi që në vitin 2014, shumë përpara se Putin ta shpallte zyrtarisht, në vitin 2018.
Lançimi i “Khabarovsk” u bë të shtunën, edhe pse ishte planifikuar fillimisht për qershor 2020. Fotot e publikuara nga ceremonia e inaugurimit treguan pjesën e pasme të nëndetëses. Belousov tha se ky është një moment historik për marinën ruse dhe se ajo do të forcojë sigurinë detare të vendit.
