Për garantimin maksimal të sigurisë gjatë funeralit të Papa Françeskut këtë të shtunë në Sheshin e Shën Pjetrit, autoritetet italiane kanë vendosur masa të jashtëzakonshme.
Përveç snajperistëve të vendosur në çatitë e ndërtesave përreth zonës, në terren do të jenë aktive edhe pajisje speciale anti-dron, të cilat kanë për qëllim neutralizimin e çdo mjeti fluturues të paautorizuar.
Bëhet fjalë për një lloj armë penguese elektronike, që funksionon duke bllokuar valët radio të dronëve, duke i detyruar ata të ulen ose të devijojnë fluturimin. Kjo teknologji përdoret shpesh në evente të mëdha me rrezik të lartë, për të shmangur çdo kërcënim të mundshëm nga ajri.
Prania e këtyre masave tregon nivelin e lartë të vigjilencës dhe ndjeshmërisë që autoritetet kanë për sigurinë gjatë ceremonisë së fundit për kreun e ndjerë të Kishës Katolike.
