Trajneri i Teutës, Edi Martini, shprehet me keqardhje për mënyrën sesi skuadra e tij pësoi tre gola në pjesën e dytë ndaj Elbasanit, duke zhvlerësuar atë paraqitje të mirë gjatë 45 minutave të para.
“Në pjesën e parë luajtëm mjaft mirë, Elbasani ndryshoi modul loje në të dytën. Kaluam edhe ne me një rreshtim duke lënë një qendërsulmues para. Goli i pësuar në fillim i dha zemër Elbasanit, i dha më shumë moral. Kur shënuan golin e dytë morën mesfushën në pjesën e dytë, ishin më të freskët se ne. Ata ishin më të freskuar nga ndërrimet, ishte një pjesë e dytë e keqe nga ne. Nuk bëmë qarkullimin, ramë nën presionin e Elbasanit dhe ata e përmbysën.
Të dy golat erdhën ku kemi pikën më të fortë ne, jemi plot në zonë, kundërshtari ka dy lojtarë, ne katër. Kjo të vjen keq. Elbasani na vuri në vështirësi, na mori mesin e fushës dhe erdhën aksionet e tyre.
Markimet janë kryesorja, lejuam dy qendrat e tyre të ktheheshin mbrapa, gjë që pjesën më të madhe ishim në markim një për një. Në pjesën e dytë u tërhoqëm, ata morën topin, kaluan në superioritet numerik në mesfushë dhe pastaj erdhën nga krahët. Të tre lojtarët e qendrës duhej të ishin më egër, nuk duhej të ktheheshin. Ishte ndeshje me dy tablo, që nuk duhet të ndodhë më, se të luash pjesën e parë aq mirë, të kesh mundësi për 2-0 e të kthehesh në pjesën e dytë dhe të na kthejnë, nuk duhet të ndodhë më”, tha Martini pas ndeshjes.
