Liderët e Bashkimit Europian kanë arritur një marrëveshje për t’i dhënë Ukrainës një kredi prej 90 miliardë eurosh, duke shmangur përdorimin e aseteve ruse të ngrira, çështje që shkaktoi përçarje mes vendeve anëtare. Vendimi u mor pas më shumë se një dite negociatash intensive në samitin e Brukselit.
Presidenti i Këshillit Europian, Antonio Costa, bëri të ditur se kredia do të garantohet nga buxheti i përbashkët i BE-së dhe do të mbulojë nevojat urgjente ushtarake dhe ekonomike të Ukrainës për dy vitet e ardhshme.
Sipas vlerësimeve të BE-së, Ukraina ka nevojë për rreth 135 miliardë euro shtesë deri në vitin 2027 për të shmangur kolapsin financiar.
Presidenti Volodymyr Zelensky kishte kërkuar që ndihma të sigurohej përmes përdorimit të mbi 200 miliardë eurove asete ruse të ngrira, por Belgjika, ku ndodhet pjesa më e madhe e tyre, kërkoi garanci ligjore për ndarjen e përgjegjësive financiare, gjë që nuk u pranua nga të gjitha shtetet anëtare.
Zelensky falënderoi liderët europianë për unitetin dhe theksoi se është thelbësore që asetet ruse të mbeten të bllokuara. Ndërkohë, liderët europianë e cilësuan marrëveshjen si një sinjal të fortë politik ndaj Moskës.
Vendimi vjen në një moment kritik për Ukrainën, e cila ka paralajmëruar se pa financim deri në pranverë do të detyrohet të reduktojë prodhimin e dronëve dhe kapacitetet mbrojtëse, ndërsa paralelisht po zhvillohen përpjekje diplomatike për një marrëveshje paqeje të nxitur nga Shtetet e Bashkuara.
