Edhe pse sot përfundon kontrata 4-vjeçare mes LSI-së dhe PS-së, ende nuk ka ndonjë sinjalizim, nëse do të rinovohet apo jo ky pakt mes dy forcave më të mëdha qeverisëse.
Ish-ministri i Transporteve Edmond Haxhinasto tha se ende nuk është marrë ndonjë vendim se si do të vijojë më tej marrëdhënia PS-LSI. Nga Prrenjasi, Haxhiansto tha: “Të jeni të bindur se në momentin që do të merret një vendim për këtë çështje do e merrni vesh. E rëndësishme është që koalicionet të jenë funksionale, serioze. Marrëveshjet të bëhen të elaboruara, të detajuara në mënyrë që secila nga palët të ketë shumë mirë të përcaktuara, cilat janë përgjegjësitë e përbashkëta dhe, sigurisht, kjo do të jetë e rëndësishme edhe në momentin e llogaridhënies”.
Ai thotë se koalicioni ka arritur të realizojë gjëra pozitive, por shton se ka aspekte të rëndësishme që mund dhe duhet të ishin bërë ndryshe e një nga këto aspekte, për LSI-në, është edhe arsimi.
“Kjo nuk është një çështje politike, kjo është çështje e përqasjes që ne kemi për të ardhmen e Shqipërisë. Nëse projektojmë një zhvillim më të shpejtë të Shqipërisë, nëse projektojmë një zhvillim me ritme më të larta të ekonomisë, nëse projektojmë një Shqipëri europiane, edhe sistemi arsimor duhet t’i përgjigjet në mënyrën më efikase këtyre sfidave. Mendoj se ka shumë për të bërë. Edhe kryetari i LSI-së u shpreh qartë për vizionin që ka LSI në ato gjëra që duhen bërë për arsim, në mënyrë që brezi i ri të jetë në lartësinë e sfidave për t’u integruar në mënyrën më dinjitoze në BE”, shton ai.
