Mafia italiane po braktis betejat rivale për supremaci për të bashkëpunuar në fushat e trafikut të drogës, prostitucionit dhe pastrimit të parave, tha sot Agjencia Kombëtare Antimafia (DIA) në raportin e saj vjetor mbi grupet e krimit të organizuar.
Siç shtohet, organizata siciliane Coza Nostra dhe Camorra nga rreth Napolit po krijojnë aleanca brenda dhe jashtë vendit, ndërsa “Ndrangheta” nga Kalabria është gjithnjë e më e përqendruar në kontrollin e projekteve të punëve publike.
“Bashkëjetesa ka çuar në sinergji të shprehur përmes formimit të strukturave të afta për të neutralizuar konfliktet, mosmarrëveshjet dhe tensionet ”, tha drejtoresha e DIA-s, Michele Carbone, në konferencën për shtyp, raportoi Reuters.
Raporti thekson se projektet e mëdha të punëve publike u kërcënuan nga infiltrimi i mafias, prandaj masat për të luftuar këtë organizatë kriminale u përqendruan në sektorin e ndërtimit në vitin 2024, ku u kryen 200 hetime në vendet për ndërtimin e projekteve publike.
Carbone theksoi gjithashtu se mafia po zotëron gjithnjë e më shumë njohuritë teknologjike dhe po përdor kanale komunikimi të koduara, si dhe po mban kontakte me të burgosurit përmes dronëve.
Në të njëjtën kohë, anëtarët e mafies po përdorin gjithnjë e më shumë rrjetet kineze të “bankave nëntokësore” për të pastruar para , tregon raporti i DIA-s.
Një tjetër përfundim i raportit është se ka një rekrutim të dukshëm të grupeve të margjinalizuara të të rinjve të cilët punësohen nga anëtarët e mafies për të kryer vepra penale, dhe rrjetet sociale kontribuojnë veçanërisht në përhapjen e këtij fenomeni.
