Juristi dhe analisti Kreshnik Spahiu deklaroi se regjimi iranian është drejt rrëzimit si investuesi kryesor i Hamasit në Gaza, Hezbollahut në Liban dhe Huthëve në Jemen. Në një analizë gjeopolitike në një studio televizive, Spahiu theksoi se lufta e nisur mes Izraelit dhe Iranit nuk është një konflikt i izoluar, por një përplasje me prapavijë strategjike dhe ekonomike, që mund të ndryshojë ekuilibrat rajonalë dhe globalë.
Sipas tij, nëse konflikti përshkallëzohet, mund të shkaktohet një valë e madhe emigracioni nga Irani me rreth 15 milionë persona që mund të dynden drejt Europës, duke krijuar pasoja të rënda sociale dhe ekonomike për kontinentin.
Spahiu nënvizoi se ndërhyrja e Vladimir Putin në këtë krizë shihet më shumë si një përpjekje për të forcuar pozitat e tij në negociatat për Ukrainën, sesa një mbështetje reale për aleatin iranian.
Ai theksoi se konflikti aktual është i lidhur edhe me ambiciet bërthamore të Iranit dhe me strategjinë perëndimore për të shkatërruar rrjetin financiar dhe ushtarak të regjimit të Ajatollahëve, të cilët janë mbështetësit kryesorë të grupeve të armatosura anti-perëndimore në rajon.
Spahiu paralajmëroi se regjimi i Ali Khameneit është i brishtë dhe i pambrojtur ndaj një revolte të mundshme të brendshme. Ai theksoi se Irani, ndonëse duket një shtet i fuqishëm, është një vend multietnik dhe i përçarë, me shumë grupe të gatshme t’i kundërvihen regjimit aktual në rast të përshkallëzimit të krizës.
Sipas tij, ekziston një opozitë e organizuar brenda dhe jashtë vendit, e mbështetur nga diaspora iraniane, e cila mund të aktivizohet në çdo moment për të çuar drejt një lëvizjeje civile dhe ndoshta një konflikti të brendshëm.
Spahiu tha se gjendja shëndetësore dhe mosha e lartë e liderit suprem Ali Khamenei, si dhe mungesa e një trashëgimtari të qartë, janë elementë që përshpejtojnë procesin e dobësimit të regjimit. Ai e cilësoi këtë fazë si fillimi i fundit për regjimin iranian.
“Nuk përjashtohet që situata në Iran të ngjajë me atë në Siri, ku konflikti i brendshëm solli destabilizim të madh dhe ndërhyrje të huaja. Numërimi mbrapsht për regjimin në Teheran ka filluar”, përfundoi Spahiu.
