Britania e Madhe po zhvendos mjete ushtarake në Lindjen e Mesme, përfshirë avionë luftarakë, në përgjigje të tensioneve të fundit midis Iranit dhe Izraelit. Lajmin e bëri të ditur kryeministri britanik Keir Starmer, ndërsa udhëtonte drejt Kanadasë për samitin e G7-ës, sipas raportimeve të BBC.
“Ne po zhvendosim mjete në rajon, përfshirë avionë luftarakë, dhe kjo është për mbështetje emergjente,” u shpreh Starmer para gazetarëve që udhëtonin me të.
Britania aktualisht ka avionë luftarakë RAF të pozicionuar në zonë si pjesë e Operacionit Shader, i cili mbështet luftën kundër ekstremizmit në Lindjen e Mesme.
Kryeministri britanik theksoi se situata është duke ndryshuar me shpejtësi dhe se Londra është në konsultime të vazhdueshme me aleatët ndërkombëtarë. “Mesazhi ynë i pandryshuar është që tensionet të ulen sa më shpejt të jetë e mundur”, theksoi Starmer.
