Lali Eri është lodhur nga qetësia dhe maturia e ofruar ndaj artistëve. Madje atij i ka ardhur në majë të hundës kur e shajnë, e ofendojnë, e gjuajnë me vezë, i bëjnë pankarta. Lali Erit i është sosur durimi, aq sa nuk është treguar fare etik, por ka thënë edhe fjalët e fundit, pa frenuar gojën.
Kreu i Bashkisë së Tiranës, Erion Veliaj, ka organizuar një dëgjesë publike me arkitektë dhe urbanistë, për shembjen e Teatrit Kombëtar dhe ndërtimin e një teatri të shoqëruar nga kullat. Veliaj ofendoi protestuesit që janë kundër këtij projekti, duke thënë se ata janë “mitomanë” dhe “një cirk shëtitës”. Ai kujtoi “gjyqin” publik që i është bërë atij që nga plehrat, qentë e rrugës, lodrat etj.
“Unë jam akoma në gjyq, me disa nga këta personazhet që i bashkohen çdo proteste. Po të shikosh, është i njëjti grup, grupi i këndit të lodrave, ka uzurpuar dhe teatrin, tjetër gjë që faturën e paguan një parti politike për LED-in dhe foninë.
Është i njëjti grup, ekziston një cirk shëtitës, mitomanësh, në Shqipëri, të cilët, në çdo event thonë se janë shoqëria civile. Po prit, se janë 40 mijë organizata, ti je vetëm tre.
Edhe për plehrat, edhe për qentë, edhe për lodrat, edhe për bulevardin, edhe për asbestin te pazari i ri, kështu që është shumë e rëndësishmë të dallojmë çfarë është muzikë dhe çfarë është zhurmë”.
E gjithë propaganda e pushtetit është angazhuar ditët e fundit për ta paraqitur çështjen e Teatrit Kombëtar, si një dasi mes artistëve. Në qëndrimet e aktorëve të pamësuar me gjuhën e politikës, Veliaj arriti deri diku që të frenonte dufin e tyre, por duket se kjo histori nuk do të lihet me kaq.
