Kryeministri Albin Kurti ka vizituar sot familjarët e Beqir Sefës, Rifat Zekës dhe Shemë Mustafës, tre policëve të Kosovës të rrëmbyer dje nga forcat serbe në kufi me Serbinë e në brendi të territorit të Kosovës.
Zyra e Kryeministrit Kurti njofton se në Mitrovicë, Kryeministri u mirëprit nga familjarët e Shemë Mustafës, përfshirë të vëllanë e tij që ishte po ashtu polic kufitar.
“Familjaret vlerësuan përkrahjen nga institucionet e Republikës së Kosovës dhe nga populli, që po ua lehtëson barrën. Në fshatin Peran të Komunës së Podujevës, ai u prit nga familjarët e Beqir Sefës, në mesin të cilëve ishte dhe djali i tij, që po ashtu është pjesëtar i Policisë së Kosovës në Prishtinë dhe i angazhuar në Task Forcën për veri”, thuhet në njoftimin e Kryeministrisë.
Gjithashtu bëhet me dije se Kurti gjatë takimit ka njoftuar familjarët se është në kontakt me institucionet atje, në përpjekje për të marrë sa më parë dhe sa më shumë informacione për gjendjen e policëve të rrëmbyer.
Kujtojmë që ditën e djeshme u rrëmbyen tre efektivë të policisë së Kosovës. Kosova pretendon se janë rrëmbyer brenda kufirit, ndërsa Serbia thotë se të armatosur kishin hyrë në kufirin e tyre.
