Në një seancë dëgjimore në Komisionin e Medias, kryeredaktori i gazetës “Rilindja Demokratike”, Bledi Kasmi, tha prerazi se atij i janë shuar shpresat tek drejtësia, ndërsa i është rikthyer edhe një herë ditës kur ai u godit.
Kasmi tha qartazi se pasi i ishte rikthyer videos dhe kishte reflektuar, kishte parë një skemë të qartë për ta goditur. Ndër të tjera, ai tha se dy deputetë i dhanë ndihmën e parë, dhe se pasi kishte shkuar në spital, kishte patur një ndërhyrje për rreth 40 minuta.
“Kam qenë në protestë, duke filmuar dhe fotografuar, duke bërë punën time. Në kohën kur protesta po vijonte tek Ministria e Brendshme, pati konfrontime me policinë, duke shkatërruar bandierat.
Nuk kishte një kordon të qartë policie se ku ishte kufiri i policisë dhe ai i protestuesve. Në këto kushte, ne gazetarët kemi qendruar në një pozicion ku mund të bënim foto dhe të filmonim. Pas një kërkese që më është bërë nga një operator i një media, jam ulur nga ai pozicion.
Protesta pati disa episode, por nuk kemi një regjistrim të plotë të situatës, për të kuptuar dinamikën e asaj që ndodhi. Shpesh herë kordoni i policisë shtynte protestuesit.
Pati një agresin dhe dhunë ndaj disa protestuesve. 4 min para se të ndodhte incidenti, një protestues u godit dhe mbeti pa ndjenja, ai është Kastriot Hasko.
Edhe unë vendosa të vetëmbrohesha. Dua t’ju kujtoj edhe nga fotografitë, janë shumë gazetarë që kanë qenë në vijën e parë dhe nuk e di pse shkopi më përzgjodhi vetëm mua”.
Sipas Kasmit, goditja ishte e qëllimshme dhe se Ardi Veliu e kishte vizituar për të manipuluar të vërtetën. Ai tha se e kishte marrë mesazhin e drejtorit të policisë, si një ndërhyrje për të arritur një lloj paqtimi, për atë çfarë kishte ndodhur. Sikundër e ka thënë edhe më herët, Kasmi i mëshoi faktit se Veliu e kishte kundërshtuar, se shkopi i gomës nuk shkakton çarje në kokë.
“Në spital më ka ardhur drejtori i policisë, z. Veliu, më ka vizituar dhe është mirëpritur nga ana ime dhe familjarët e mi. E mora mesazhin e drejtorit si një ndërhyrje për të arritur një lloj paqtimi për atë që kishte ndodhur. Zotëria më tha që kishte ardhur për situatën shëndetësore.
Në ato momente i shpjegova se u godita nga një shkop gome shumë i fortë. Ka ndërhyrë dhe më ka thënë që shkopi i gomës nuk shkakton çarje në kokë. Aty e kuptova se vizita e tij nuk kishte qëllim që të dënonte dhunën dhe të distancohej, por kishte si qëllim të manipulimit të së vërtetës.
Në këto momente pati një acarim mes njerëzve të mi, familjarë dhe drejtorit të policisë, por ka qenë ndërhyrja profesionale e mjekut kirurg i cili i shpjegoi drejtorit të policisë të vërtetën e plagës që unë kisha në kokë. Sipas mjekut, plaga ishte shkaktuar nga një mjet i fortë i rrumbullakët. Po sipas këtij mjeku, nuk kishim të bënim me një send me cepa, por nga një mjet i rrumbullakët”.
