Zyra e Mahmoud Abbasit, presidentit të Autoritetit Palestinez, ka dënuar vendimin e kabinetit të sigurisë izraelite, duke e quajtur atë një “krim të mirëfilltë” dhe një shkelje të ligjit ndërkombëtar.
Në një deklaratë, presidenca paralajmëroi se ky hap do të shkaktojë një “katastrofë humanitare të paprecedentë” dhe akuzoi Izraelin për ndjekjen e politikave të “gjenocidit, vrasjes, urisë dhe bllokadës”. Deklarata theksoi se populli palestinez nuk do të pranojë asnjë realitet të imponuar me forcë dhe ritheksoi të drejtën e tij për vetëvendosje dhe për një shtet të pavarur me Jerusalemin Lindor si kryeqytet, raporton bbc. Po ashtu, u tha se udhëheqja palestineze do t’i drejtohet urgjentisht Këshillit të Sigurimit të OKB-së dhe do të kërkojë mbledhje emergjente të Ligës Arabe dhe Organizatës për Bashkëpunim Islamik. Në fund, deklarata i bënte thirrje presidentit amerikan, Donald Trump që të ndërhyjë për të ndalur planin dhe të shtyjë përpara një paqe të përhershme.
Ndryshe, Autoriteti Palestinez, i udhëhequr nga Abbasi dhe i dominuar nga lëvizja Fatah, qeveris vetëm disa pjesë të Bregut Perëndimor që nga viti 2007, kur Hamasi mori kontrollin e Gazës pas fitores në zgjedhjet legjislative të vitit 2006.
Udhëheqësia e Autoritetit Palestinez ka deklaruar vazhdimisht se është e gatshme të marrë përsipër qeverisjen e Gazës pas luftës, por është kritikuar nga palestinezët për qëndrimet e vakëta dhe mungesën e veprimit efektiv.
