Kryetari i Partisë Demokratike, Sali Berisha, ka akuzuar ashpër ish-ministren e Bujqësisë, Frida Krifca, dhe Kryeministrin Edi Rama për abuzim me fondet e BE të destinuara për fermerët shqiptarë. Ai ka deklaruar se 130 milionë euro, të cilat u dhanë nga Bashkimi Europian për mbështetje të bujqësisë, u shpërdorën nga Krifca, e cila, sipas tij, i përdori për projekte turistike luksoze dhe jo për bujqësinë, siç ishte planifikuar.
“BE i dha Shqipërisë 130 milionë euro për fermerët, por Krifca i përdori për resorte turistike dhe vila luksoze, jo për bujqësinë. Ajo nuk i shpëtoi hetimit të BE, por Rama e mori këshilltare në zyrat e tij, çka do të thotë se ata e kishin ngrënë ‘dardhat’ bashkë,” tha Berisha, duke i referuar kështu abuzimeve të supozuara me paratë publike.
Berisha gjithashtu ka akuzuar Ramën për mbrojtjen e Krifcës, duke e emëruar atë këshilltare në qeverinë e tij, pavarësisht hetimeve europiane. Ai ka theksuar se veprimet e Krifcës janë dëshmuar nga hetimet e BE, dhe se ky rast është një shembull i qartë i lidhjeve të ngushta mes Ramës dhe abuzimeve me fonde publike.
