Policia e Kosovës ka arrestuar 16 persona në një operacion të zhvilluar të mërkurën në pjesën jugore dhe veriore të Mitrovicës, bëri të ditur zëdhënësi i Prokurorisë Themelore në Mitrovicë, Valon Preteni.
Të arrestuarit dyshohen për kryerjen e veprës penale të “kontrabandës me armë dhe mjete plasëse”. Aksioni policor u shtri në 21 lokacione dhe synonte luftimin e veprimtarive kriminale të kontrabandës me armë dhe municione.
Policia e Kosovës ka konfirmuar se operacionet e tilla do të vazhdojnë edhe në komuna të tjera, në kuadër të përpjekjeve për të parandaluar aktivitetet e paligjshme, veçanërisht pas sulmit të Banjskës, që ka intensifikuar kontrollet dhe arrestimet në veri të vendit.
