Fitorja me rezultatin 2-0 ndaj Polonisë në Tiranë, në raundin e gjashtë të eliminatoreve të Kampionatit Europian të futbollit bëri që Kombëtarja Shqiptare jo vetëm të renditet e para në grupin E, por sipas “Football Ranking”, kuqezinjtë tashmë kanë mbi 90% mundësi për të qenë pjesë e finaleve të Kampionatit Europian të Futbollit në vitin 2024, që do të luhet në Gjermani.
“Football Ranking” në tabelën e publikuar sot, në kuadër të përfundimit të raundit të gjashtë, vlerëson kuqezinjtë si pretendentë kryesorë për t’u kualifikuar në raundin final të “Gjermani 2024”. Sipas renditjes, Shqipëria ka 90% shanse, Çekia renditet në vendin e dytë me 87.96%, ndërsa Polonia renditet e treta me 21.36% të mundësive për t’u kualifikuar.
Në grupin E, Shqipëria renditet e para me 10 pikë, por Çekia e vendit të dytë, që ka 8 pikë, ka një ndeshje më pak dhe me një fitore ngjitet në krye, duke lënë kuqezinjtë në vendin e dytë. Nga grupi ynë kalojnë dy skuadrat e renditura të parat. Ndërsa në garë për t’u kualifikuar më tej janë edhe Moldavia dhe Polonia.
Sipas kalendarit, Shqipëria ka edhe tre ndeshje për të zhvilluar. Në 12 tetor në “Air Albania” djemtë e Sylvinhos do të përballen me Çekinë, ndërsa në 17 nëntor kuqezinjtë do të jenë në transfertë përballë Moldavisë. Kuqezinjtë mbyllin garën në 20 nëntor kundër Ishujve Faroe në Tiranë.
