Një dopietë e Diogo Jotës dhe një gol i Mohamed Salah në ndeshjen e tij të 150-të në kampionatin anglez, bënë që Liverpuli të triumfonte me rezultatin e pastër 0-3 në “Emirates Stadium” përballë Arsenalit dhe të rikthehet në garë për një vend në zonën Champions.
Megjithatë trajneri gjerman i “the reds”, Jurgen Klopp nuk është ende i qetë dhe pranoi në konferencën për shtyp se do të duhet të luftojnë ende shumë për të arritur objektivin e vetëm të mbetur këtë sezon në kampionat pasi titulli është i Sitit.
“Ishte një fitore e bukur, pas një ndeshjeje të dominuar, megjithatë gara për zonën Champions është ende shumë e vështirë, pasi nuk është vetëm Chelsea, por edhe skuadra si West Ham, Everton e Tottenham. Do të na duhet të djersijmë shumë deri në fund, pasi nuk mund të pranojmë dështim në këtë mision”, deklaroi Klopp.
