Qeveria kineze po përdor kompanitë e saj të teknologjisë për të ndërtuar një sistem të sofistikuar propagande të bazuar në inteligjencën artificiale, me synim formësimin e opinionit publik në vende të ndryshme të botës.
Dokumente të siguruara nga studiues të pavarur dhe vlerësime të inteligjencës amerikane tregojnë se këto përpjekje po bëhen gjithnjë e më agresive dhe të mirëorganizuara.
Një nga kompanitë më aktive në këtë fushë është GoLaxy, e cila ka zhvilluar një sistem të quajtur “Smart Propaganda System”, i njohur ndryshe si GoPro.
Ky sistem përdor inteligjencën artificiale për të analizuar reagimet publike në kohë reale dhe për të prodhuar përmbajtje propagandistike të personalizuar, duke shpërndarë mesazhe që shmangin zbulimin nga algoritmet e rrjeteve sociale.
Dokumentet e brendshme tregojnë se GoLaxy ka qenë e angazhuar në fushata ndikimi në Hong Kong dhe Tajvan, dhe ka mbledhur të dhëna për qindra politikanë dhe figura publike amerikane, përfshirë më shumë se 100 anëtarë të Kongresit të SHBA-ve.
Në fokus kanë qenë edhe mbi 2 mijë personalitete të tjera të jetës politike dhe mediatike në Amerikë.
Qëllimi i këtij operacioni është krijimi i një propagande më të sofistikuar, që ngjan me përmbajtje autentike të krijuar nga përdorues realë, duke forcuar narrativat pro-qeveritare kineze dhe duke ndikuar qëndrimet ndërkombëtare mbi çështje si Tajvani, Covid-19 dhe politika e jashtme kineze.
Ndërkohë që GoLaxy prezantohet si një kompani e pavarur, dokumentet tregojnë lidhje të ngushta me Akademinë Kineze të Shkencave dhe agjenci të sigurisë kombëtare kineze.
Kjo hedh dritë mbi një bashkëpunim të ngushtë midis shtetit dhe sektorit të teknologjisë në Kinë për qëllime strategjike.
Ekspertët e teknologjisë dhe sigurisë paralajmërojnë se ky është një shembull i qartë i militarizimit të inteligjencës artificiale në fushën e informacionit.
Sipas tyre, në mungesë të një përgjigjeje të koordinuar nga Perëndimi, rreziku që propaganda e automatizuar të ndikojë proceset demokratike në vendet e tjera është real dhe në rritje.
Ndërkohë, SHBA-të kanë reduktuar përpjekjet e saj për të luftuar operacionet e huaja të ndikimit, çka e bën situatën edhe më shqetësuese në sytë e zyrtarëve të inteligjencës amerikane.
