Kandidatja për Bashkinë e Korçës Ledina Alolli, prej datës 26 mars është zyrtarisht kandidate e koalicionit “Berisha – Meta”.
Mirëpo, edhe pse kanë kaluar pesë ditë nga kandidimi zyrtar dhe regjistrimi në KQZ Alolli vazhdon të mbajë postin e Dekanes në Fakultetin Ekonomik në Universitetin Fan S. Noli të Korçës, duke shkelur kështu haptazi, ligjin për arsimin e lartë në Republikën e Shqipërisë.
Si duket Rektori Dhimitër Bello, aprovon qëndrimin e saj dhe është bërë palë në shkeljen e ligjit.
“Ligji Nr.80/2015 “Për arsimin e Lartë dhe Kërkimin Shkencor në Institucionet e Arsimit të Lartë në Republikën e Shqipërisë”, në Nenin 5 të tij, pika 3 citon: “Institucionet e Arsimit të Lartë ruajnë NEUTRALITET politik.”, thuhet në ligj.
Kandidatja Alolli ka më shumë se 3 muaj që bën fushatë elektorale, menjëherë pas fitores në Primaret e Korçës dhe zyra e dekanatit është shndërruar në zyrë grupseksioni të Foltores, ku hyjnë dhe dalim militantë dhe simpatizantë të partisë, atje zhvillohen edhe takime të gjata politike dhe organizative për fushatën.
Veç kësaj, nëse ndiqni veprimtarinë elektorale të kandidates në Facebook apo Instagram, nga e hëna në të premte, kandidatja e Salianjit është çdo ditë në lagje dhe fshatra të Korçës duke bërë fushatë për zgjedhjet.
Të gjitha këto ndodhin në sy të kolegëve të saj, të studentëve, por edhe të vetë rektorit. Në Ligjin për Arsimin e Lartë, Neni 50 mbi “Mbarimin e Parakohshëm të Mandatit të autoriteteve drejtuese dhe anëtarëve të zgjedhur të organeve drejtuese të institucionit publik të Arsimit të Lartë”, Pika 1 / c: “Mandati i autoritetit ose anëtarit të zgjedhur mbaron para kohe në rastet e pamundësisë për të kryer detyrën”.
Ligji parashikon dy fakte të padiskutueshme, fakte që nuk ka hapësirë për interpretim: e para që, arsimi i lartë ruan neutralitet politik dhe e dyta që nuk ekziston mundësia e kryerjes së detyrës, për shkakun politik.
Dy nene që vijnë si shkak – pasojë e njëri-tjetrit në rastin e dekanes kandidate. Pra pamundësia për të kryer detyrën buron nga angazhimi politik dhe angazhimi politik e përjashton nga angazhimi në arsimin e lartë. Për këto shkaqe ligji parashikon DORËHEQJEN.
Posti i Dekanes është post i zgjedhur. Ashtu siç kandidatë të tjerë kanë dhënë dorëheqjen nga postet e zgjedhura që mbanin, të njëjtën gjë duhet të bëjë kandidatja Alolli e Korçës. Nëse nuk e jep dorëheqjen, atëherë Rektori Dhimitër Bello duhet ta shkarkojë nga detyra dekanen dhe nëse edhe ky nuk e bën, atëherë Ministrja e Arsimit Evis Kushi duhet të shkarkojë Dekanen dhe të depolitizojë Univesitetin e Korçës, që është shndërruar në godinë elektorale për Foltoren.
