Që Partizani të nisë me serinë e afrimeve, duhet të punojë fillimisht me largimet për të liruar hapësirë në ekip, por edhe financat janë aq të rëndësishme për klubet tona. Kështu, te “Demat” do të jenë të detyruar të bëjnë edhe të tilla kompromise, duke kërkuar ndërprerjet e bashkëpunimit me një numër të caktuar lojtarësh, që për atë që kanë dhënë gjatë kësaj kohe, nuk e kanë bindur trajnerin Gega dhe bashkëpunëtorët e tij.
AFRIMET E JANARIT – Nikola Vujnoviç dhe Dmitri Podstrelov ishin dy nga afrimet më të shtrenjta dhe më premtues të janarit, por pas disa muajsh mund të themi se asnjëri prej tyre nuk i ka përmbushur pritshmëritë dhe klubi pritet t’iu kërkojë “divorcin”. Ata janë nën kontratë dhe do të duhet një zgjidhje e dyanshme për largimin. Në ditët në vijim me siguri pritet të nisin negociatat. Sakaq, fjalë ka pasur edhe për David Atanaskoskin, por situata e tij është më e komplikuar. Edhe Mateo Çipi ka luajtur shumë pak. Gjithashtu, Besar Gudjufi nuk ka arritur ta fitojë besimin e stafit teknik dhe ka luajtur shumë pak. Për të dhe për Çipin klubi mund të arsyetojë edhe një huazim, ku të luajnë më shumë minuta dhe të kthehen të Partizani në gjendje për të luftuar për formacionin.
TË TJERËT – Edhe lojtarë të tjerë, që janë pjesë e skuadrës prej kohësh, mund të ndahen me klubin në këtë verë. Anteo Osmanllari erdhi pas një sezoni shumë të mirë tek Erzeni, por te Partizani ai ishte gjithnjë zgjedhje e dytë apo e tretë. Nga ana tjetër, edhe Mateo Shanaj, i blerë tek Apolonia, nuk ka arritur të gjejë vend rregullisht në skuadër, me përjashtim të një periudhe me trajnerin Veselinoviç, i larguar tashmë. Nisur nga mosha e re dhe fakti që premtojnë për të ardhmen si për Shanajn, ashtu edhe për Osmanllarin pritet që Partizani të shqyrtojë opsionin e huazimit. Sakaq, ka pasur fjalë edhe për një largim të mundshëm të Zekës, por fakti është se mes palëve nuk ka pasur asnjë komunikim të tillë, me sulmuesin, që ka edhe një vit kontratë, me opsionin e rinovimit edhe për një tjetër.
