Në limitet e afatit kohor të vendosjes së armëpushimit mes Tel Avivit dhe Teheranit, Izraeli ka ndërmarrë një tjetër operacion në Iran që është finalizuar me vrasjen e një shkencëtari të njohur bërthamor.
Agjencia iraniane e lajmeve Nournews raportoi se shkencëtari bërthamor Mohammadreza Sediqqi u vra në një sulm izraelit në provincën Gilan, në veri të Iranit. Sipas të njëjtit burim, gjithsej nëntë persona humbën jetën në këtë sulm ajror ndaj banesave civile.
Në kundërpërgjigje, Irani lëshoi një breshëri raketash drejt territorit izraelit, duke vrarë pesë persona në qytetin jugor të Beershebës, konfirmojnë autoritetet izraelite.
Pavarësisht përshkallëzimit të situatës, Zyra e Kryeministrit të Izraelit, Benjamin Netanyahu, njoftoi pranimin e propozimit të Presidentit amerikan Donald Trump për armëpushim me Iranin.
Në deklaratën zyrtare, Tel Avivi theksoi se “Izraeli do të përgjigjet me forcë ndaj çdo shkeljeje të armëpushimit” dhe pretendoi se ka përmbushur objektivin strategjik:
“Izraeli e ka arritur qëllimin e tij për të eliminuar kërcënimin bërthamor dhe balistik të Iranit,” thuhet në deklaratën e Kryeministrisë.
Izraeli falënderoi gjithashtu Shtetet e Bashkuara për mbështetjen ushtarake dhe politike:
“Në operacionin ‘Luani Lindor’, Shteti i Izraelit shënoi arritje të mëdha historike dhe u vendos në të njëjtin nivel me fuqitë botërore,” thuhet më tej në deklaratë.
Por armëpushimi zgjati shumë pak, ku brenda disa orëve, ministri i Mbrojtjes së Iranit, akuzoi Iranin se e ka shkelur atë dhe paralajmëroi rinisjen e sulmeve.
