Izraeli ka akuzuar Iranin se po ecën me vendosmëri drejt përfundimit të programit të tij për zhvillimin e armëve bërthamore. Kjo deklaratë erdhi pas një raporti të brendshëm të Agjencisë Ndërkombëtare të Energjisë Atomike (IAEA), sipas të cilit Irani ka shtuar ndjeshëm ritmin e pasurimit të uraniumit në nivelin 60%, shumë afër nivelit 90% të nevojshëm për krijimin e armëve bërthamore.
Në një deklaratë nga zyra e kryeministrit izraelit Benjamin Netanyahu, thuhej se Irani po injoron paralajmërimet ndërkombëtare dhe po ndjek objektiva bërthamorë me qëllime ushtarake. “Komuniteti ndërkombëtar duhet të ndërhyjë menjëherë për ta ndalur”, thuhet në deklaratë. Më tej theksohej se shkalla aktuale e pasurimit të uraniumit nuk ka arsye civile dhe është karakteristikë vetëm e shteteve që ndjekin armatimin bërthamor.
Sipas të dhënave më të fundit të IAEA-së, deri më 17 maj Irani ka grumbulluar 408.6 kilogramë uranium të pasuruar në nivelin 60%, me një rritje prej 133.8 kilogramësh brenda tre muajve të fundit – një përshpejtim i ndjeshëm krahasuar me rritjen prej 92 kilogramësh në periudhën paraprake. Sasia totale e uraniumit të pasuruar nga Irani ka arritur në 9247.6 kilogramë, që është mbi 45 herë mbi kufirin e lejuar nga marrëveshja bërthamore e vitit 2015 me fuqitë botërore.
IAEA shprehu shqetësim të thellë në raportin e saj, duke theksuar se Irani është i vetmi shtet jo-bërthamor që prodhon në mënyrë të vazhdueshme materiale bërthamore kaq të ndjeshme.
Kjo situatë vjen në një moment kur SHBA-ja dhe Irani janë përfshirë në bisedime të vazhdueshme për të frenuar tensionet rreth çështjes bërthamore. Megjithatë, qëndrimet e tyre mbeten larg: Uashingtoni kërkon ndalimin e plotë të pasurimit të uraniumit nga Irani, ndërsa Teherani e refuzon këtë kërkesë, duke argumentuar se ka të drejtë të zhvillojë program bërthamor për qëllime civile, siç lejohet nga Traktati për Mospërhapjen e Armëve Bërthamore (NPT), i cili është nënshkruar edhe nga Irani.
Raundi i fundit i bisedimeve mes të dyja vendeve u mbajt më 23 maj në Romë, nën ndërmjetësimin e Sulltanatit të Omanit. Pavarësisht mungesës së progresit të dukshëm, përfaqësuesit iranian dhe amerikan, Abbas Araghchi dhe Steve Uitkoff, shprehën gatishmërinë për vazhdimin e dialogut, edhe pse ende nuk është caktuar një datë për takimin e radhës.
