Izraeli ka përfunduar me sukses ndërtimin e një arme mbrojtëse me lazer, tha sot Ministria izraelite e Mbrojtjes.
“Testet e kryera kanë treguar se sistemi mund të kapë me besueshmëri raketa, predha mortajash, avionë dhe dronë në skenarë të ndryshëm operacionalë, tha në një deklaratë ministria.
Sistemet e para pritet të integrohen në mbrojtjen ajrore të Izraelit deri në fund të vitit.
Përfundimi me sukses i fazës së zhvillimit dhe testimit përshkruhet si një “moment vendimtar” përpara se sistemi t’i dorëzohet ushtrisë për përdorim operacional.
Kompanitë izraelite të mbrojtjes “Elbit Systems” dhe “Rafael” ishin të përfshira në ndërtimin e kësaj arme.
Sistemi i njohur si “Rrezja e Hekurt” është një sistem mbrojtës ajror me lazer me bazë tokësore që, falë teknologjisë së saktë të shënjestrimit dhe efikasitetit të lartë, mund të neutralizojë shpejt kërcënimet duke pasur kosto shumë të ulëta operative.
Sipas burimeve amerikane, sistemi lazer me kosto efektive mund të neutralizojë objektiva të tilla si dronët për rreth 4 dollarë për një përdorim.
Në të kundërt, sistemi shumështresor i mbrojtjes nga raketat – i përdorur më parë nga Izraeli është dukshëm më i shtrenjtë.
Prototipet e lazerëve taktikë me rreze të shkurtër veprimi janë përdorur tashmë në konfliktet e fundit dhe kanë interceptuar “dhjetëra kërcënime”.
Ministri izraelit i Mbrojtjes, Israel Katz tha se ky ishte një “moment historik” për armët mbrojtëse të Izraelit. Ai tha se Izraeli ishte vendi i parë që zotëronte një sistem të tillë.
