Izraeli miratoi planin për pushtimin e plotë të Gazës, Këshilli i Sigurisë së OKB-së thërret takim urgjent

Një takim urgjent i Këshillit të Sigurimit të Kombeve të Bashkuara është planifikuar për të dielën, më 10 gusht 2025, në orën 10:00 sipas kohës së Nju Jorkut, mbi zhvillimet në Gaza, me kërkesë të Shteteve Anëtare Evropiane të KS të OKB-së, Francës, Mbretërisë së Bashkuar, Danimarkës, Greqisë dhe Sllovenisë, të mbështetur nga Koreja e Jugut, Rusia, Kina, Gujana, Pakistani, Somalia, Sierra Leone dhe Algjeria.
Vëzhguesi i Përhershëm i Palestinës në OKB, ambasadori Riyad Mansour, në një letër më 8 gusht, kërkoi thirrjen e takimit të Këshillit të Sigurimit të OKB-së të shtunën, më 9 gusht 2025, megjithatë, nga respekti për “Shabbat Shalom” izraelit, u vendos përfundimisht që takimi të zhvillohej të dielën.
Në një deklaratë, Mansour, pasi i dorëzoi ambasadorit panamez që vepron si president për muajin gusht një letër ku kërkonte një takim të Këshillit të Sigurimit, theksoi se përshkallëzimi nga Izraeli “është në kundërshtim të plotë me vullnetin e bashkësisë ndërkombëtare, të drejtën ndërkombëtare dhe logjikën e shëndoshë” dhe madje “kundër dëshirave të shumicës së popullit në Izrael”.
Nga ana e tij, Përfaqësuesi i Përhershëm i Izraelit në OKB, ambasadori Danny Danon, deklaroi se “më 7 tetor, organizata terroriste Hamas rrëmbeu qytetarë britanikë, së bashku me qindra izraelitë”.
“Nëse sot 50 qytetarë britanikë do të mbaheshin në Gaza nga terroristët, qeveria britanike nuk do të mbetej inaktive. Shteti i Izraelit nuk do të ndalet së luftuari për lirimin e të gjithë pengjeve, garantimi i sigurisë dhe mbrojtjes së qytetarëve tanë është detyra jonë”, theksoi Danon.