Izraeli dhe Irani shkëmbejnë sulme të reja, goditet objekti bërthamor në Isfahan

Konflikti mes Izraelit dhe Iranit ka hyrë në një fazë të re përshkallëzimi, teksa të shtunën në mëngjes dy vendet shkëmbyen sërish sulme ajrore dhe raketore, vetëm një ditë pasi Teherani deklaroi se nuk do të negociojë për programin e tij bërthamor, duke refuzuar përpjekjet europiane për rifillimin e dialogut.
Forcat Ajrore izraelite kanë ndërmarrë një valë të re sulmesh kundër objektivave strategjikë në Iran, duke përfshirë qendra të magazinimit dhe lëshimit të raketave në rajonin qendror të vendit. Një ndër objektivat kryesorë ishte objekti bërthamor në Isfahan – një nga më të mëdhenjtë në Republikën Islamike – goditja e të cilit u konfirmua nga zëvendësguvernatori i provincës, megjithëse ai theksoi se nuk ka viktima apo dëme kritike.
Sulme janë raportuar edhe në qytetin e Qomit, ku mediat iraniane bëjnë të ditur se një 16-vjeçar ka humbur jetën dhe dy persona të tjerë janë plagosur nga një goditje izraelite në një ndërtesë civile.
Në të njëjtën kohë, ushtria izraelite njoftoi se ka eliminuar Amin For Judaki, komandantin e njësisë së dytë të dronëve të Gardës Revolucionare të Iranit. Ai akuzohej për organizimin e qindra lëshimeve dronësh nga rajoni i Ahvazit drejt territorit të Izraelit.
Rreth orës 02:30 të mëngjesit, Izraeli aktivizoi sirenat e sulmeve ajrore në disa zona të qendrës së vendit, përfshirë Tel Avivin, si pasojë e një breshërie raketash të lëshuara nga Irani.
Situata mbetet e tensionuar, ndërsa komuniteti ndërkombëtar kërkon me urgjencë zbutjen e konfliktit.