Italia bëhet vendi i parë në Evropë që zbaton plotësisht një sistem të detyrueshëm verifikimi të moshës për hyrjen në faqet pornografike.
Vendimi, i miratuar nga Autoriteti Italian për Komunikime (Agcom), hyn në fuqi në bazë të dekretit “Caivano” dhe synon të mbrojë të miturit nga përmbajtjet e papërshtatshme online.
Masat e reja do të zbatohen fillimisht për platformat me bazë në Itali, ndërsa ato që operojnë nga jashtë vendit, si Pornhub, YouPorn apo OnlyFans, kanë afat deri më 1 shkurt 2026 për t’u përshtatur me rregulloren. Deri atëherë, këto faqe do të mbeten të aksesueshme pa kufizime, raporton Ansa.
Agcom ka përgatitur dhe i ka dërguar Komisionit Evropian një listë me 48 faqe të përfshira në këtë rregullore, e cila është në përputhje me udhëzimet e Digital Services Act. Qasja në këto portale nuk do të jetë më e mundur me një klikim të thjeshtë që konfirmon moshën madhore, por vetëm përmes një aplikacioni evropian verifikimi, aktualisht në fazë testimi, ose përmes metodave të tjera të certifikuara që provojnë moshën madhore të përdoruesit.
Procesi i verifikimit do të zhvillohet në dy faza.
Fillimisht, përdoruesi duhet të shkarkojë në celular një aplikacion që konfirmon moshën përmes identifikimit personal. Më pas, faqja e ndaluar për të mitur do të kërkojë skanimin e një QR kodi ose futjen e një numri të gjeneruar nga aplikacioni. Sistemi është ndërtuar sipas parimit të “anonimatit të dyfishtë”, që garanton mbrojtjen e privatësisë. Aplikacioni i verifikimit nuk do të dijë për cilin shërbim lëshohet dëshmia e moshës, ndërsa faqja nuk do të ketë akses në identitetin e përdoruesit.
Në rast të moszbatimit të rregullores, Agcom mund të ndërhyjë brenda 20 ditësh duke paralajmëruar operatorët të përshtaten me ligjin, përndryshe faqja mund të bllokohet përkohësisht. Gjobat për shkelje mund të arrijnë deri në 250 mijë euro.
Reagimet politike në Itali kanë qenë të ndara. Mariastella Gelmini, senatore e partisë Noi Moderati, e përshkroi vendimin si “një hap të rëndësishëm për mbrojtjen e të miturve, të promovuar nga qeveria Meloni”. Ndërkohë, Roberto Giachetti nga Italia Viva e cilësoi masën si “një tjetër shenjë të shtetit që po largohet nga problemet reale të qytetarëve”.
Italia nuk është e vetme në këtë nismë. Mbretëria e Bashkuar ka miratuar së fundmi ligjin Online Safety Act, që kërkon verifikim të moshës përmes dokumenteve identifikimi ose njohjes së fytyrës. Pas zbatimit të ligjit, trafiku në faqet pornografike ra ndjeshëm, ndërsa përdorimi i VPN-ve u rrit.
Edhe Franca ka tentuar një masë të ngjashme, por ajo u pezullua nga gjykata administrative për mospërputhje me rregullat e BE-së, pasi kompania Aylo pronare e Pornhub, YouPorn dhe RedTube, i mbylli faqet e saj në shenjë proteste. Në disa shtete amerikane, faqet e Aylo-s janë bllokuar gjithashtu për mungesë të verifikimit të moshës. Ndërkohë, Komisioni Evropian ka hapur një hetim ndaj Pornhub për masat e pamjaftueshme që parandalojnë hyrjen e të miturve.
Italia, me këtë vendim, bëhet pionier në zbatimin e kontrolleve dixhitale për mbrojtjen e të rinjve, duke vendosur një precedent që mund të ndikojë në politikat e ardhshme të Bashkimit Evropian.
