Pak ditë para përballjes mes Shqipërisë dhe Serbisë më 7 qershor, emocionet dhe tensionet janë të pranishme jo vetëm në radhët e tifozëve, por edhe brenda grupit kombëtar. Trajneri Sylvinho dhe stafi teknik po përpiqen ta mbajnë skuadrën të izoluar nga presioni mediatik dhe ngarkesa emocionale që e shoqëron këtë ndeshje.
Një prej figurave që ka përjetuar nga afër precedentin e ndeshjes në Beograd në vitin 2014 është Orges Shehi. Ish-portieri i kombëtares, sot trajner, u ka bërë thirrje lojtarëve të mendojnë vetëm për rezultatin dhe të shmangin emocionet e panevojshme.
“Lojtarët duhet të jenë të qetë dhe të zhvishen nga kjo ngarkesë sepse i penalizon. Është një ndeshje që duhet interpretuar vetëm si futboll, jo me emocione kombëtare. Ne kërkojmë të marrim një rezultat që të na bëjë krenarë dhe të kënaqim kombin,” tha Shehi.
Ai shtoi se është e vështirë të ndahet historia nga sporti, por theksoi rëndësinë e përqendrimit vetëm te loja.
“U këshilloj lojtarëve që të fokusohen te futbolli. Negativiteti i tepërt i pengon në dhënien e maksimumit dhe dëmton gjithë skuadrën,” tha ai.
Në aspektin sportiv, Shehi beson se Shqipëria është në formë për t’u përballur me çdo kundërshtar.
“Kemi treguar se kemi një skuadër cilësore. Pas fitores me Andorrën dhe përballjes me Anglinë, objektivi ynë është të fitojmë në shtëpi, me ndihmën e tifozëve,” tha ish-portieri.
Për sa i përket rezultatit të mundshëm ndaj Serbisë, Shehi u shpreh me bindje “fitojmë ne 1-0.”
