Saga e transferimit të Ademola Lookman nga Atalanta te Inter ka hyrë në një ngërç total.
Pavarësisht interesit të madh të zikaltërve për sulmuesin nigerian, klubi bergamask nuk ka treguar gatishmëri për ta shitur tek një rival direkt në Serie A.
Atalanta nuk pranon as të vendosë një çmim zyrtar, për të shmangur sinjalin se mund të negociojë seriozisht me Interin.
Nga ana tjetër, drejtuesit e Interit, Beppe Marotta dhe Piero Ausilio, mbeten të palëkundur në qëndrimin e tyre: nuk do të bëjnë oferta të reja derisa situata mes Atalantës dhe lojtarit të zgjidhet.
Klubi milanez është i gatshëm të shpenzojë deri në 45 milionë euro plus 5 milionë bonuse, por Atalanta shpreson të përfitojë shifra të ngjashme vetëm nga tregu ndërkombëtar.
Ndërkohë, Lookman, i cili ka një marrëveshje personale me Interin për një kontratë pesëvjeçare me 4,5 milionë euro në vit, është në “grevë” të heshtur.
Ai është larguar nga stërvitjet në Zingonia dhe nuk dëshiron të kthehet, duke dërguar një mesazh të qartë se dëshiron vetëm kalimin në Milano.
Atalanta, megjithatë, nuk është e gatshme të dorëzohet lehtësisht dhe pritet të vendosë gjoba për sjelljen e lojtarit.
Në këtë situatë, Napoli po qëndron në pritje. Klubi i drejtuar nga Antonio Conte e kishte kontaktuar më herët Lookman si pasues potencial të Kvaratskhelias, por ishte tërhequr për shkak të marrëveshjes së fortë mes lojtarit dhe Interit.
Megjithatë, nëse negociatat mes Interit dhe Atalantës vazhdojnë të mbeten të bllokuara, Napoli mund të rikthehet me një ofertë më të lartë, duke tunduar drejtuesit bergamaskë.
Inter, ndërkohë, nuk ka presion të madh për mbylljen e menjëhershme të këtij transferimi.
Skuadra e re e trajnerit Cristian Chivu është e plotësuar në sulm me Lautaro Martinezin, Thuram, Pio Espositon dhe Bonny-n.
Lookman shihet si një “qershi mbi tortë”, jo si domosdoshmëri absolute.
Ditët në vijim pritet të jenë vendimtare për të kuptuar nëse ky “roman veror” do të marrë fund para ose pas Ferragostos, apo nëse do të ketë ende kthesa surprizuese.
