Të paktën pesë persona u plagosën nga goditjet me thikë pranë sheshit qendror ”Dam”, në Amsterdam, deklaroi policia, që arrestoi një të dyshuar për sulmin.
Trazirat u shkaktuan në qendër të Amsterdamit pasditen e së enjtes pas një sulmi me thikë në rrugën Sint Nicolaasstraat pranë sheshit popullor Dam, duke rezultuar në pesë persona të plagosur, sipas një deklarate të policisë.
Autoritetet kanë arrestuar një të dyshuar, por motivet e sulmit nuk janë zbuluar.
Video nga vendi i ngjarjes tregon një turmë njerëzish të mbledhur rreth zonës së rrethuar, ndërsa ambulancat, policia dhe një helikopter i urgjencës kanë shkuar në vendngjarje.
Një dëshmitar okular ka deklaruar se teksa ishte në Dam, “papritmas u dëgjua një britmë” . Megjithatë, siç shtoi ai, as ai dhe as ata që e rrethonin nuk e kuptuan menjëherë se çfarë kishte ndodhur.
Policia tha se kishte krijuar një kordon rreth zonës ku ndodhi goditja me thikë.
“Për momentin nuk kemi asnjë informacion për shkakun apo motivin e goditjes me thikë”, deklaruan autoritetet.
Një helikopter mjekësor ka zbritur në sheshin ku ndodhet Pallati Mbretëror për të dhënë ndihmën e parë.
Sipas transmetuesit lokal AT5, kryebashkiakja Femke Halsema është larguar nga mbledhja aktuale e këshillit të qytetit për të monitoruar nga afër situatën në zhvillim.
