Qarkullimi anticiklonar i Azoreve dhe ai afrikan që ka mbërthyer një pjesë të madhe të Ballkanit, tashmë do të bëjë që edhe për ditën e Premte, mbi vendin tonë të dominojnë kushte të qëndrueshme atmosferike.
Moti do të jetë i kthjellët me orë të gjata me diell, ndërsa vranësirat të pakta në formën e reve të mesme dhe të larta kalimtare, kryesisht përgjatë relieveve malore në lindje, parashikon Shërbimi Meteorologjik Ushtarak.
Era do të fryjë me drejtim verilindje-veriperëndim me shpejtësi 1-6m/s, ndërsa përgjatë vijës bregdetare, në lugina dhe në male hera herës do të fitojë shpejtësi 8-12m/s, duke bërë që valëzimi në dete të jetë i forcës 2-3ballë.
Temperaturat minimale parashikohen jo më të ulëta se 9°C, kjo kryesisht në vendet malore, ndërsa vlerat maksimale pritet të arrijnë deri 30°C në zonat e ulëta si Tirana apo Kuçova.
