Agjencitë holandeze të inteligjencës kanë grumbulluar prova që sipas tyre konfirmojnë përdorimin e gjerë të armëve kimike të ndaluara nga forcat ruse në Ukrainë. Sipas një deklarate të bërë nga ministri holandez i Mbrojtjes, Ruben Brekelmans, dhe kreu i Agjencisë së Inteligjencës Ushtarake, Peter Reesink, Rusia ka përdorur agjentë mbytës të hedhur nga dronë në llogore luftarake.
“Përfundimi kryesor është se ne mund të konfirmojmë se Rusia po intensifikon përdorimin e armëve kimike. Kjo është një prirje alarmante, sepse tashmë po kthehet në praktikë të zakonshme në këtë luftë,” deklaroi Brekelmans. Ai kërkoi vendosjen e sanksioneve më të forta ndaj Moskës.
Sipas Reuters, inteligjenca holandeze ka zbuluar raste të përdorimit të kloropikrinës – një gaz mbytës i ndaluar, i përdorur për herë të parë nga Gjermania në Luftën e Parë Botërore. Hetimi i MIVD thuhet se ka qenë i pavarur dhe i mbështetur në të dhëna të verifikuara në terren.
Në maj të vitit të kaluar, edhe SHBA akuzoi zyrtarisht Rusinë për përdorimin e kloropikrinës, ndërsa autoritetet ukrainase pretendojnë se armët kimike janë përdorur mijëra herë në fushëbetejë.
Brekelmans theksoi se të paktën tre ukrainas kanë humbur jetën si pasojë e ekspozimit ndaj agjentëve kimikë dhe më shumë se 2,500 të tjerë kanë raportuar simptoma të përputhshme me helmimin kimik.
