Mediet kosovare kanë publikuar të dhëna të reja mbi skandalin e trukimit të ndeshjeve të futbollit kosovar, ku përfshihen gjyqtarë dhe trajneri, Ismet Munishi, në atë që konsiderohet edhe si ana e errët e këtij sporti.
“Indeksonline” ka publikuar një skandal, në lidhje me ndeshjen e ligës së parë të kampionatit kosovar, mes Ramiz Sadikut dhe Ballkanit, që sipas denoncimit, presidenti i këtij të fundit u kishte kërkuar lojtarëve të tij t’ia linin ndeshjen skuadrës vendase.
Florim Kryeziu, president i Ballkanit, thuhet të ketë njoftuar trajnerin Gëzim Hasi të skuadrës përpara takimit, se rezultati duhej të dilte në favor të Ramiz Sadikut.
Mes një situate të pakëndshme, të vështirë moralisht dhe profesionalisht, trajneri Gëzim Hasi ua raporton lojtarëve lajmin se presidenti ka dhënë urdhër që ndeshja të lihej dhe të fitohej nga Ramiz Sadiku. Por, duke e pasur të vështirë këtë gjë, Hasi u thotë futbollistëve ta zgjedhin vet, nëse do të tolerojnë siç iu është dhënë urdhër, apo do të fitojnë ndeshjen.
Në fakt, takimi mes Ramiz Sadikut dhe Ballkanit përfundoi me rezultatin 1-2 për miqtë, duke nënkuptuar se lojtarët nuk kanë pranuar të tolerojnë dhe treguan profesionalizëm në fushën e blertë. Njëri prej tyre, madje, është dëgjuar teksa thoshte se nuk do ta linin ndeshjen.
Por, fitorja profesionale nuk kaloi pa u ndëshkuar, pasi disa futbollistë u larguan nga skuadra.
