Pep Guardiola është i vetëdijshëm për sezonin më zhgënjyes të viteve të fundit, i cili kaloi Mançester Sitin që mezi ia doli të siguronte një biletë për edicionin e ardhshëm të UEFA Champions League.
Por, tekniku spanjoll ka guxuar të bëjë një krahasim të qartë të realitetit të Premier Ligës dhe presionin që ekziston te dy gjigantët e futbollit spanjoll, Real Madridi e Barcelona. Konkretisht, në një intervistë për mediat britanike, Pep foli hapur për presionin që do të kishte ndjerë në Spanjë, pas një sezoni jo në nivelin e zakonshëm për standardin që ka arritur prej disa vitesh Siti. Guardiola ka dashur të nënvizojë faktin se në një situatë të tillë, nëse do të drejtonte njërin prej dy gjigantëve spanjollë, shkarkimi do të ishte i pashmangshëm.
“Me sezonin që kemi kaluar… mendoj që nëse do të isha te Real Madridi ose Barcelona, do të më kishin shkarkuar. Nuk do të kisha asnjë shans të vazhdoja. Nëse kjo do të kishte ndodhur te Barça, ose Real Madridi, do të më kishin larguar menjëherë, pa e menduar shumë”, deklaroi Guardiola.
Ky sezon, pavarësisht se Mançester Siti fitoi sërish trofe, nuk ishte i zakonshëm për skuadrën e Guardiolës, e cila humbi titullin kampion në Premier Ligë pas tri sezonesh radhazi dominimi, duke ia dorëzuar fronin Liverpullit. Gjithsesi, Pep ka ndërmend ta vijojë projektin e tij në Mançester, duke punuar për një tjetër cikël fitues. Por deklarata e tij nxori në pah ndryshimet e mëdha në filozofinë e klubeve angleze dhe atyre spanjolle, ku presioni mbi trajnerët është shumë më i madh, pavarësisht trofeve të fituar më parë.
Guardiola, fitues i trefishtë në vitin 2023 me Mançester Sitin dhe autor i epokës më të suksesshme në historinë e klubit nga “Etihad”, ka bërë me dijë se kërkon ende ta ringrejë skuadrën drejt majave duke nisur nga sezoni i ardhshëm. Por, më parë ka lëshuar një mesazh të qartë se në Angli ka më shumë besim dhe durim për trajnerët, në krahasim me presionin e madh që ndihet te Reali apo Barça.
