Me argumentin se ka shumë lojtar të talentuar që nuk mund ti fusë Pep Guardiola ka kërkuar shitjen e tyre ose do të largohet nga Manchester City. Numri i lartë i futbollistëve sipas tij thyen ekipin dhe nuk krijon një grup kompakt
Pep Guardiola ka dhënë një mesazh të fortë për drejtuesit e Manchester City-t, duke deklaruar se është i gatshëm të largohet nëse klubi nuk redukton numrin e lojtarëve në skuadër gjatë merkatos së verës.
“Është e pamundur për shpirtin tim të lë kaq shumë lojtarë jashtë fushe” tha tekniku spanjoll.
Në fitoren 3-1 ndaj Bournemouth të martën, disa prej emrave të rëndësishëm si Abdukodir Khusanov, Savinho, James McAtee, Claudio Echeverri dhe Rico Leëis nuk u përfshinë në listën e 20 lojtarëve të grumbulluar. Kjo ndodhi pavarësisht se City tashmë është futur në zonën e Champions League dhe është në vendin e tretë në Premier League.
“Kam thënë qartë se nuk dua një skuadër të madhe. Nuk dua të kem pesë ose gjashtë lojtarë në ‘të ngrirë’. Do të largohem. Jepmëni një skuadër më të shkurtër dhe do të qëndroj. Është e pamundur për shpirtin tim t’u them lojtarëve se nuk do të luajnë,” deklaroi Guardiola.
City ka shpenzuar mbi 200 milionë paund në merkaton e janarit për të afruar katër lojtarë: Khusanov, Omar Marmoush, Nico Gonzalez dhe Vitor Reis. Ndërkohë, Echeverri iu bashkua ekipit pas huazimit në River Plate. Aktualisht, vetëm Kevin De Bruyne është i konfirmuar për largim këtë verë, ndërsa e ardhmja e Jack Grealish është e paqartë.
Guardiola, i cili ka kontratë deri në vitin 2027, theksoi se një skuadër e madhe është e paqëndrueshme dhe dëmton shpirtin e ekipit. Ai tha se një grup më i vogël krijon lidhje më të forta mes lojtarëve, diçka që këtë sezon, sipas tij, ka munguar.
Ndërkohë që Premier League lejon deri në 25 lojtarë të regjistruar, Guardiola kërkon që City të mos e tejkalojë këtë shifër. Aktualisht, klubi ka 28 lojtarë në ekipin e parë dhe katër të tjerë të huazuar. Në krahasim, skuadra si Arsenal, Liverpool dhe Aston Villa kanë pasur një numër më të reduktuar lojtarësh këtë sezon
