Vetëm 24 ditë pas ndeshjes së fundit në Premier League, Manchester City rikthehet në fushë për të nisur sezonin e ri në Botërorin e Klubeve që zhvillohet në Shtetet e Bashkuara të Amerikës dhe për të rimarrë titullin që ngriti në 2023.
Presidenti Khaldoon Al Mubarak, shprehet se ky turne nuk është vazhdim i sezonit të kaluar, që përfundoi pa trofe, por nisja e një epoke të re për ekipin e Guardiolës.
City e mbylli sezonin 2024-25 në vendin e tretë, pa fituar asnjë trofe, diçka që nuk kishte ndodhur prej tetë vitesh. Humbja në finalen e FA Cup ndaj Crystal Palace dhe eliminimi i hershëm nga Champions League thelluan zhgënjimin. Për këtë arsye, klubi investoi mbi 100 milionë paund për përforcime, përfshirë mesfushorin holand ez Tijjani Reijnders dhe talentin francez Rayan Cherki.
Gjithashtu, janë kthyer nga dëmtimet Rodri – fitues i Topit të Artë – dhe Oscar Bobb, ndërsa në mbrojtje është shtuar edhe Rayan Ait-Nouri nga Wolves për 31 milionë paund, duke i dhënë City-t një mbrojtës të mirëfilltë në krahun e majtë për herë të parë pas largimit të Mendy-t.
Megjithatw skuadra e mbingarkuar ka sjellw dilema për Guardiolën
Që nga janari, janë afruar edhe emra si Nico Gonzalez, Omar Marmoush, Vitor Reis, Abdukodir Khusanov dhe Claudio Echeverri, duke e çuar në nëntë numrin e afrimeve të reja që prej fillimit të vitit. Por me 34 lojtarë në dispozicion dhe një skuadër të kufizuar prej 27 vetash për turneun, largimet janë të pashmangshme.
Kyle Walker, Kalvin Phillips dhe Jack Grealish nuk janë përfshirë në listë dhe pritet të largohen nëse arrihen marrëveshje. Ndërkohë, mesfushori Bernardo Silva ka konfirmuar qëndrimin dhe ka marrë shitirin e kapitenit.
Guardiola ka bërë ndryshime edhe në stafin teknik, duke sjellë Pep Lijnders, ish-asistent i Klopp te Liverpool, si ndihmës kryesor. Kolo Toure është bashkuar gjithashtu për turneun, duke ndihmuar në stërvitje. Skuadra po përgatitet në Florida dhe atmosferën në stërvitje e karakterizon intensiteti dhe kërkesa për “cilësi dhe shpejtësi”.
Kampionët e botës të vitit 2023 janë favoritë për të mbrojtur titullin. “Kupa e Botës është një mundësi e jashtëzakonshme për të kuptuar se vijmë këtu të gjithë së bashku, për të treguar se kush jemi në mënyrën më të mirë, duke luajtur sportin që duam” – u shpreh Guardiola duke hedhur dorashkën për sfidën e titullit.
