Numri i të vdekurve në tërmetin e fuqishëm që goditi Mianmarin ka arritur më shumë se 1600, ndërkohë që shpëtimtarët po kërkojnë me dëshpërim në rrënojat e ndërtesave të shembura për të gjetur të mbijetuar. Mbi 3400 persona janë plagosur.
Ushtria e Mianmarit shpalli gjendje emergjente dhe i bëri thirrje çdo personi që mund të ndihmojë të shkojë atje. Kombet e Bashkuara janë tashmë në kontakt me autoritetet.
Sipas të dhënave të USGS, epiqendra e tërmetit ishte rreth 17.2 kilometra larg qytetit të Mandalay, i cili ka rreth 1.2 milion banorë. Rreth 12 minuta pas tërmetit të parë, zona u godit edhe nga një tërmet tjetër me forcë 6.4.
Shpëtimtarët nxorën sot një grua të gjallë nga rrënojat e një ndërtese të shembur në Mandalay, 30 orë pas tërmetit shkatërrues që goditi Mianmarin, njoftuan gazetarët e Agjencisë France-Presse (AFP).
Gruaja 30-vjeçare, Phyu Lay Khaing, u nxor nga rrënojat e një kondominiumi Sky Villa dhe më pas u transportua me mbajtëse deri te burri i saj, Ye Aung, i cili e përqafoi para se ajo të dërgohej në spital, raporton AFP.
“Sinqerisht, në fillim nuk besova se ishte ende e gjallë”, tha Ye Aung ndërkohë që po priste që gruaja e tij të dilte nga nën pjesët e shembura të ndërtesës.
Më herët, një zyrtar i Kryqit të Kuq tha për AFP se më shumë se 90 persona mund të ishin ende të bllokuar nën rrënojat e ndërtesës të shembur.
