Një ngjarje jo e zakontë ka ndodhur në Paris, ku dyqani i një nga markave më të njohura në qendër të qytetit, Bulgari, është bërë pjesë e një grabitjeje me armë.
Ende nuk është bërë e ditur vlera e sendeve të vjedhura, ndërkohë që policia është ende në proces hetimi për identifikimin e autorëve.
Kanë qenë videot e filmuara nga kalimtarët ato që i kanë dhënë më shumë dritë ngjarjes e cila mesa duket ka ndodhur më 29 prill, duke zbuluar se grabitësit kanë qenë tre persona.
Në video duket një person i veshur me helmetë motoristi i cili qëndron përpara dyqanit ndërsa në duar ka një armë.
Pas disa momentesh, nga dyqani dalin dy anëtarët e tjerë të grupit dhe ekipi largohet nga vendngjarja me dy motoçikleta.
Kjo nuk është hera e parë që ky dyqan bie pre e grabitësve, pasi një situatë e ngjashme ka ndodhur edhe në vitin 2021, ku grabitësit arritën të merrnin bizhuteri me vlerë 10 milionë dollarë.
