Egnatia mundi Bylisin me rezultatin 2-1, teksa sfida pati vlerë për javën e 23-të të Superiores. Regi Lushkja ishte autor i golit të parë, që i hapi rrugë triumfit rrogozhinas.
Pas ndeshjes foli pikërisht Lushkja, që me 9 golat e tij në Superiore është dhe golashënuesi kryesor i Egnatias.
“Dua të uroj të gjithë çunat për ndeshjen dhe fitoren, është meritë e të gjithë ekipit që kemi arritur ku jemi edhe për fitoren sot. Sa i përket anës personale, besoj nga statistikat që kam mund të jetë ndoshta momenti më i mirë, por e theksoj që ky është edhe meritë e ekipit që nxjerr në pah cilësitë e mia.
Trajneri punon shumë me ne gjatë gjithë seancave stërvitore, na kërkon më shumë se beson në cilësitë e ekipit. Kemi bërë mirë deri tani, por nuk kemi perfeksionuar ende atë që kërkon ai. Besoj se me punë mund të arrijmë shumë shpejt te ajo që kërkon trajneri.
Edhe Ujka është një lojtar shumë cilësor, që ndihmon ekipin, po jep maksimumin. Besoj se do të rritemi të gjithë më shumë se jemi një ekip që jemi grup dhe ajo që na përfaqëson ne është forca jonë në grup”, u shpreh Lushkja.
