Godina e “Kongresit të Përmetit” i cili është mbajtur në 24 maj të vitit 1944, në qytetin që u çlirua i pari nga pushtimi nazist, do t’i nënshtrohet së shpejti restaurimit.
Ministrja e Kulturës, Mirela Kumbaro, në një takim të mbajtur në mjedistet e kësaj godine, e cila sot ndodhet në një gjendje të degraduar, prezantoi projektin për restaurimin e saj, në praninë e veteranëve dhe qytetarëve të Përmetit.
Gjatë takimit me ministren Kumbaro, pjesëmarrësit në takim, u njohën me planin restaurues, ku dhe ndanë opinionet e tyre për të ruajtur sa më shumë nga ajo çfarë ka mbetur origjinale nga degradimi i madh përgjatë viteve që ka pësuar kjo ndërtesë.
Objekti ku u zhvillua “Kongresi i Përmetit” ndodhet në qendër të qytetit. Për vlerat e mëdha historiko – kulturore që ai mbart është shpallur Monument Kulture i Kategorisë së I-rë. Zgjedhja e Përmetit si vendi për t’u mbajtur ky kongres nuk ishte rastësore, kjo, jo vetëm se ishte qyteti i parë i çliruar nga pushtimi nazist, por edhe për vlerat që qyteti përfaqëson.
Në këtë kongres, ku morën pjesë 200 delegatë nga e gjithë Shqipëria, ndër vendimet kryesore të marra ishte dhe “ndërtimi i Shqipërisë së re dhe demokratike sipas vullnetit të popullit”.
Restaurimi i kësaj godine me vlera historike për Qytetin e Luleve, por jo vetëm, është tashmë një tjetër premtim i mbajtur.
