U mbyll me sukses nata e parë gjysmëfinale e Festivalit të Këngës Magjike.
Në skenën magjike, për më shumë se tre orë, u dhurua emocion, spektakël, art i vërtetë dhe performanca brilante, nën drejtimin e producentit dhe moderatorit Ardit Gjebrea dhe vajzës së tij, Anna Gjebrea, e cila është rritur në prapaskenat e këtij festivali.
Në natën e parë gjysmëfinale u ngjiten në skenë 23 artistë, prej të cilëve 14 në kategorinë “Big” dhe nëntë artistë në kategorinë “New”.
Përpara jurisë ndërkombëtare prej pesë antarësh, artistët e rinj duhet të merrnin 5 jeshile për të marrë statusin “Big”, ndërsa artistët e konfirmuar tashmë, veç jurisë, bagazhin emocional dhe artistik duhet ta shpërfaqnin përpara një publiku të madh në sallë dhe audience të madhe në ekranin e televizionit Klan.
Askush nuk i shpëtoi emocioneve.
Akoma më i madh ishte përjetimi i artistëve të rinj në këtë skenë të madhe. Ky vit shënon 25 vite të Festivalit të Këngës Magjike, i cili përmes kartolinave të artistëve kujtoi ato këngë dhe ata këngëtarë që gjatë viteve lanë shenjë në këtë festival.
Përpos simpatisë dhe dashurisë që mori si moderatore, Anna Gjebrea surprizoi publikun mbrëmë edhe me talentin e saj si artiste, duke përshtatur mjaft mirë këtë skenë që është një derë e hapur për të gjithë talentet e rinj.
Nuk munguan as surprizat, duke bërë edhe publikun pjesë të këtij edicioni të veçantë.
Produksioni i “Këngës Magjike” bëhet gati sonte për natën e dytë gjysmëfinale, ku në skenë do të ngjiten 24 artistë dhe ku nuk do të mungojnë surprizat.
