Gjykata e Lartë në Kravelë ka dhënë masën për tre policët e Kosovës, të arrestuar më 14 qershor nga forcat serbe. Sipas vendimit të gjykatës tre policët e Kosovës do të qëndrojnë në ambientet e paraburgimit për 30 ditë.
Sipas autoriteteve serbe, ata dyshohet se kanë kryer veprën penale: prodhim, posedim, mbajtje dhe trafikim i paligjshëm i armëve dhe lëndëve plasëse.
“Pas kësaj, prokurori i lartë publik në Kralevë do të vendosë nëse do të propozojë paraburgim dhe më pas gjyqtari do të vendosë nëse do të caktojë paraburgim prej 30 ditësh. E gjithë kjo duhet të vendoset deri në orën 12:30, kur skadon 48-orët e ndalimit policor”, u tha më herët në njoftimin e bërë nga Prokuroria.
Rifat Zeka, Beqir Sefi dhe Mustafë Shemi u arrestuan në brendësi të territorit të Kosovës, teksa ishin duke patrulluar, ndërkohë që Serbia thotë se ata kishin hyrë në territorin e saj. Mirëpo, sinjalet e lokalizimit GPS të makinave tregojnë se ata kanë qenë brenda territorit të Kosovës kur janë rrëmbyer.
Avokati serb, i cili e përshkruan veten si pro perëndimor, ka thënë se sipas “Marrëveshjes së Brukselit, Serbia e trajton Policinë e Kosovës si forcë të armatosur legale. Prandaj, nëse pjesëtari i asaj policie gjendet me armë në territorin e Serbisë pa i shkelur ligjet tjera, ai nuk mund të arrestohet, sepse statusi i tij për Serbinë është po aq i ligjshëm sa statusi i policisë së Republikës së Serbisë”.
Por, në fakt Serbia po bën të kundërtën duke e shkelur këtë marrëveshje, pasi prej 48 orësh tre policët janë arrestuar dhe rrëmbyer nga forca speciale “Kobra” e ushtrisë serbe, madje duke cënuar integritetin territorial të Kosovës.
