Gjykata Kushtetuese e Bullgarisë njoftoi këtë të premte se ka miratuar dorëheqjen e presidentit Rumen Radev, duke i hapur rrugën largimit të tij nga posti.
Radev dha dorëheqjen këtë javë, duke nxitur spekulime se ai mund të krijojë partinë e tij politike për të garuar në zgjedhjet e ardhshme parlamentare. Mandati i tij, kryesisht ceremonial, duhej të zgjaste deri në janar të vitit 2027.
Gjykata Kushtetuese bëri të ditur se kompetencat e Radev tashmë janë hequr.
Dorëheqja e presidentit vjen pas largimit të qeverisë së mëparshme muajin e kaluar. Radev do të zëvendësohet nga zëvendëspresidentja Iliana Iotova, e cila pritet të emërojë një qeveri teknike dhe të caktojë datën e zgjedhjeve parlamentare, të tetat brenda katër viteve.
Radev ka përmendur prej kohësh mundësinë e krijimit të një force të re politike, me synimin për të sjellë stabilitet dhe për të luftuar korrupsionin në një nga vendet më të varfra dhe më të korruptuara të Bashkimit Evropian, e cila u bë pjesë e zonës euro më 1 janar.
Ende mbetet e paqartë nëse ai do ta ndërmarrë këtë hap përpara zgjedhjeve të ardhshme.
