Gjermania dhe Portugalia përplasen në një duel që premtón zjarr e spektakël në një gjysmëfinale të Ligës së Kombeve që ngjan më shumë me një finale të parakohshme. Të dyja kombëtaret kanë qenë makineri golash në çerekfinalet me dy ndeshje të këtij edicioni, me nga pesë gola secila, duke treguar forcën ofensive dhe ambicien për trofe.
Gjermania e Julian Nagelsmann, për herë të parë në finalet e Ligës së Kombeve dhe me avantazhin e fushës (Allianz Arena) pasi mikpret turneun, është në formë të lartë. “Die Mannschaft” ka humbur vetëm një nga 12 ndeshjet e fundit në tokën gjermane (8 fitore, 3 barazime), ajo humbje e vetme ndaj Turqisë në nëntor 2023 ishte debutimi i Nagelsmann në shtëpi. Që atëherë, gjërat kanë ndryshuar ndjeshëm dhe skuadra gjermane ka ndërtuar një besim të ri, të fortë, që mbështetet edhe nga pesë fitore radhazi ndaj portugezëve, përfshirë dhe atë triumf 4-2 në takimin e fundit mes tyre.
Në anën tjetër, Portugalia vjen me lavdinë e së kaluarës: fituese e edicionit të parë të kësaj lige në 2019, por me hije të mëdha mbi kokë. Fitorja ndaj Danimarkës erdhi vetëm pas kohës shtesë, ndërkohë që flitet gjithnjë e më shumë për një ndërrim trajneri, me emrin e José Mourinhos që përmendet si pasardhës i Roberto Martínez. Shto këtu edhe diskutimet për të ardhmen e Cristiano Ronaldos, që ndoshta po përjeton kapitullin e fundit me fanellën e kombëtares.
Në aspektin sportiv, Portugalia nuk ka fituar në tri ndeshjet e fundit jashtë fushe në këtë kompeticion (2 barazime, 1 humbje) dhe kjo përballje në tokë gjermane është një provë e madhe psikologjike.
Lojtarët për t’u parë: Leroy Sané është në superformë, me 6 kontribute direkte për gola (4 gola, 2 asiste) që prej ndeshjes së fundit të Gjermanisë. Nga ana tjetër, Francisco Trincão ka mbyllur sezonin me 5 kontribute për gola në 5 ndeshjet e fundit për Sportingun dhe ishte vendimtar si zëvendësues ndaj Danimarkës me dy gola.
Statistikë për t’u mbajtur mend: Portugalia ka ka ruajtur vetëm një herë portën të paprekur në tetë ndeshjet e fundit në këtë edicion të Ligës së Kombeve. Një shenjë që sulmi duhet të bëjë më shumë se mbrojtja.
