Miliarder amerikan George Soros i ka dorëzuar drejtimin e perandorisë së tij financiare dhe bamirëse prej 25 miliardë dollarësh djalit të tij, Alex Soros. Gjatë një interviste me Wall Street Journal financieri me origjinë hungareze tha se djali i tij “e kishte fituar”.
Alex është i vetmi anëtar i familjes që ulet në komitetin e investimeve për Menaxhimin e Fondeve Soros, mjeti për të cilin Wall Street Journal thotë se po menaxhon 25 miliardë dollarë për familjen dhe fondacionin bamirës.
Alex Soros është shprehur se Fondacionet e Shoqërisë së Hapur do të ndjekin të njëjtat synime që kanë pasur nën drejtimin e babait të tij, duke përfshirë fjalën e lirë, reformën e drejtësisë penale, të drejtat e pakicave dhe refugjatëve dhe mbështetjen e politikanëve liberalë.
Por, ai gjithashtu dëshiron të përfshijë nisma për të drejtat e votës, abortin dhe barazinë gjinore, ndërsa ndjek një agjendë më të fokusuar në SHBA, shkruan BBC.
George Soros lindi në Hungari, ku si fëmijë jetoi tmerrin e pushtimit nazist në vitet 1944-45. Familja e tij fshehu identitetin e tyre hebre për të mbijetuar. Pas luftës ai u largua nga Hungaria për në Londër, më vonë u zhvendos në Nju Jork ku vazhdoi të fitonte miliarda përmes aktiviteteve të tij të fondit mbrojtës.
Që nga vitet 1990, pasuria e familjes Soros është drejtuar për të mbështetur ndërtimin e demokracisë në dhjetëra vende. Por vitet e fundit, ish-menaxheri i fondit mbrojtës 92-vjeçar është bërë fokusi i komploteve antisemite.
