Italia duhet të rikthehet të “hungërijë”. Dhe kjo nuk është thjesht një metaforë. Tutto sport raporton se Rino Gattuso është kandidati kryesor për të marrë drejtimin e kombëtares italiane pas largimit të befasishëm të Luciano Spallettit.
Pas javësh krizash dhe refuzimesh, Federata Italiane e Futbollit ka nisur kontaktet e para eksploruese me ish-mesfushorin legjendar të “Azzurrëve”, tashmë i lirë pas përfundimit të kontratës me Hajduk Split.
Ndryshe nga Claudio Ranieri, i cili refuzoi ofertën për shkak të mungesës së mbështetjes nga klubi i Romës dhe polemikave të mundshme për rolin e dyfishtë, Gattuso është një njeri i lirë dhe i gatshëm të marrë këtë sfidë. Ai renditet para Fabio Cannavaro dhe Daniele De Rossi.
Federata është në kërkim të një trajneri që të rikthejë shpirtin luftarak dhe unitetin në grup – më shumë se një strateg taktik, duhet një motivator.
Pikërisht kjo është arsyeja pse Gattuso, me përvojën e tij në stola si Milan, Napoli dhe Valencia, shihet si pasardhësi ideal i Marcello Lippit në një moment të vështirë për kombëtaren.
Mandati i tij do të fokusohet vetëm në kualifikimin për Kupën e Botës, pasi një tjetër dështim do të sillte rënien e të gjithë strukturës drejtuese të futbollit italian.
Plani fillestar i presidentit Gabriele Gravina përfshinte Stefano Pioli, por tekniku vendosi të respektojë fjalën e dhënë ndaj Fiorentinës, me të cilën po negocion një kontratë trevjeçare.
Edhe nëse Pioli do pranonte, federata përballej me probleme ekonomike dhe juridike, pasi ai është ende nën kontratë me Al-Nassr dhe nuk mund të nënshkruante ligjërisht para 10 korrikut.
Një tjetër emër që është përmendur është Roberto Mancini, i cili sipas disa burimeve është ofruar për t’u rikthyer, por marrëdhëniet e tensionuara me Gravina pas largimit të papritur verën e kaluar, e bëjnë të pamundur një bashkëpunim të ri në këtë fazë.
Në rrjet është përmendur edhe emri i José Mourinho, por paga e tij është shumë e lartë për arkën e FIGC. Një opsion më realist do të ishte Rafa Benitez, megjithatë pista e një trajneri të huaj mbetet spekulative.
